پاکستان اور قازقستان نے تجارتی راہداری معاہدے پر دستخط کرنے پر اتفاق کیا ہے۔ یہ اتفاق رائے وفاقی وزیر تجارت سید نوید قمر سے قازقستان کے سفیر یرژان کستافین کے درمیان جمعرات کو ہونے والی ملاقات میں طے پایا۔ اس موقع پر قازقستان اور پاکستان کے درمیان تجارت کے فروغ کے لئے ممکنہ مواقع پر تبادلہ خیال کیا گیا۔

وفاقی وزیر سید نوید قمر نے کہا کہ دونوں ممالک کے درمیان مضبوط اقتصادی اور تجارتی تعلقات کو مزید مستحکم کرنے کے خواہاں ہیں، دونوں فریق معاہدوں کو پایہ تکمیل تک پہنچانے کے عمل کو تیز کریں گے۔ انہوں نے کہا کہ پاکستان آنے والے مہینوں میں تجارت پر مشترکہ ورکنگ گروپ کے اگلے اجلاس کی میزبانی کرے گا۔ قازقستان کے سفیر نے وفاقی وزیر کی حمایت پر ان کی تعریف کی اور امید ظاہر کی کہ معاہدوں کو جلد حتمی شکل دی جائے گی۔

انہوں نے پاکستانی کھیلوں کے سامان، فرنیچر اور سیاحت میں بھی گہری دلچسپی ظاہر کی۔سید نوید قمر نے قازقستان کے سفیر کو او آئی سی کے رکن ممالک کے 18ویں تجارتی میلے میں بطور مہمان خصوصی مدعو کیا۔ او آئی سی تجارتی میلہ 16 سے 18 جولائی 2023 کو لاہور میں خواتین کی کاروباری شخصیت کے موضوع پر منعقد ہو گا۔وفاقی وزیر نے نے قازقستان کی حکومت کو او آئی سی کے تجارتی میلے میں “خصوصی پویلین” قائم کرنے کی بھی دعوت دی۔