آرمی چیف جنرل عاصم منیر نے کہا ہے کہ دہشتگردی کیخلاف جاری جنگ میں کامیابی کیلئے پرعزم ہیں، کسی دہشتگرد گروپ کو پنپنے نہیں دیں گے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر کی زیرصدارت 225ویں کور کمانڈر کانفرنس کا انعقاد گزشتہ روز ہوا جس میں میں ملکی سیکیورٹی صورتحال پر غور کیا گیا۔ آئی ایس پی آر کے مطابق کانفرنس میں شرکا کو درپیش خطرات، دہشتگردی کے بڑھتے واقعات، مقبوضہ جموں کشمیر کی صورتحال اور دہشتگردوں کا گٹھ جوڑ توڑنے پر بریفنگ دی گئی۔ آئی ایس پی آر کے مطابق کورکمانڈر کانفرنس میں سانحہ پشاور کے شہدا کو خراج عقیدت پیش کیا گیا۔

اس موقع پر آرمی چیف نے کہا کہ ایسی بزدلانہ کارروائیاں قوم کے عزم کو متزلزل نہیں کر سکتیں، دہشتگردی کیخلاف جاری جنگ میں کامیابی کیلئے پرعزم ہیں۔دہشتگردوں کیخلاف آپریشن پرتوجہ مرکوز رکھی جائے۔ آئی ایس پی آر کےمطابق کانفرنس کےشرکا نے مقبوضہ کشمیر میں انسانی حقوق کی سنگین خلاف ورزیوں اور بھارت کی جانب سے آبادیاتی تبدیلیوں کا بھی نوٹس لیا گیا۔

شرکا نے کہا کہ پاکستان اصولی طور پر بہادرکشمیریوں کی آزادی کی جدوجہدکی حمایت کرتا رہےگا، مسئلہ کشمیر کا حل اقوام متحدہ کی قراردادوں اور کشمیریوں کی امنگوں کے مطابق چاہتے ہیں۔