جاپان کی ائیرو اسپیس ایکسپلوریشن ایجنسی نے کہا ہے کہ ایچ تھری راکٹ کا لانچنگ کے دوران دوسرا انجن فیل ہو گیا جس کے بعد کنٹرول روم سے راکٹ کو خودکار طریقے سے تباہ ہونے کی کمانڈ بھیج کر تباہ کر دیا گیا ہے۔جاپان کی ائیرواسپیس ایکسپلوریشن ایجنسی کی جانب سے گزشتہ تین دہائیوں کی کوششوں کے بعد میڈیم لفٹ ایچ تھری راکٹ بنایا گیا تھا جس کی لانچنگ میں ناکامی کو جاپانی حکومت کی جانب سے افسوسناک قرار دیا گیا ہے۔جاپانی انجنیئرز کی جانب سے بنائے گئے ایچ تھری راکٹ کو اسپیس ایکس کے فالکن نائن راکٹ کے مقابلے میں سرکاری اور نجی سیٹلائیٹس کو دھرتی کے مدار میں بھیجنے کیلئے ایک سستے متبادل کے طور پر پیش کیا جا رہا تھا۔جاپانی ایجنسی کے مطابق گزشتہ روز انجنیئرز کی جانب سے 57 میٹر طویل راکٹ کو مانیٹرنگ سیٹلائیٹ سمیت خلا میں بھیجنے کی تیاریاں مکمل کر لی گئی تھیں تاہم اپنی لانچنگ کے چند منٹ بعد لانچنگ کے دوسرے مرحلے میں انجنیئرز راکٹ کو خودکار طریقے سے تباہ کرنے کے احکامات بھیجنے پر مجبور ہو گئے تھے۔