امریکا نے لاہور میں ریلی کے دوران مبینہ پولیس تشدد سے جاں بحق ہونے والے پی ٹی آئی کارکن کے لواحقین سے اظہارتعزیت کرتے ہوئے زخمیوں کی صحتیابی کیلئے دعا کی۔امریکی محکمہ خارجہ کے ترجمان نیڈ پرائس نے میڈیا سے گفتگو میں کہا کہ وہ سابق پاکستانی وزیر اعظم عمران خان کی اعلان کردہ ریلی کے دوران لاہور میں ہونیوالی جھڑپوں سے آگاہ ہیں۔
نیڈ پرائس کا کہنا تھا کہ ہم جاں بحق ہونے والوں کے اہل خانہ سے تعزیت کرتے ہیں اور جو لوگ اس میں زخمی ہوئے ہیں ان کی جلد صحت یابی کی دعا کرتے ہیں۔امریکی ترجمان نے کہا کہ ہم سب کو تحمل کا مظاہرہ کرنے کی ترغیب دیتے ہیں۔ان کا مزید کہنا تھا کہ پاکستان سمیت دنیا بھر میں اپنے ہم منصبوں سے مستقل اس پر بات کرتے رہتے ہیں، جس میں شہریوں کے عالمی حقوق کو برقرار رکھنے کو اہمیت دی جاتی ہے، اس میں پرامن اجتماع کا حق بھی شامل ہے۔گذشتہ روز پی ٹی آئی کی ریلی پر پولیس کی شیلنگ اور تشدد سے ایک کارکن جاں بحق ہوگیا تھا۔