پی ایس ایل 8 کے فائنل میں لاہور قلندرز، ملتان سلطانز کو سنسنی خیر مقابلے کے بعد 1 رن سے شکست دے کر مسلسل دوسری بار پی ایس ایل چیمپئن بن گیا ہے۔

لاہور کے قذافی اسٹیڈیم میں کھیلے گئے میچ میں دفاعی چیمپئن لاہور قلندرز کے کپتان شاہین آفریدی نے ٹاس جیت کر پہلے بیٹنگ کا فیصلہ کیا۔ لاہور قلندرز نے پہلے کھیلتے ہو ئے مقررہ 20 اوورز میں 200 رنز بنائے اور ملتان سلطانز کو جیت کیلئے 201 رنز کا ہدف دیا۔

جواب میں ملتان سلطانز کی ٹیم مقررہ 20 اوورز میں 8 وکٹس کے نقصان پر 199 رنز بناسکی اور اسے ایک رن سے شکست کا سامنا کرنا پڑا۔ لاہورقلندررز کی جانب سے عبداللہ شفیق 65، فخر زمان نے 39 اور شاہین شاہ آفریدی نے 15 گیندوں پر 44 رنز بنائے۔ ملتان سلطانز کی جانب سے اسامہ میر نے 3 کھلاڑیوں کو آؤٹ کیا۔

ملتان سلطانز کی جانب سے رلی روسو 52، رضوان 34 اور خوشدل شاہ 25 رنز بنا کر نمایاں رہے۔ لاہور قلندرز کی جانب سے کپتان شاہین آفریدی نے 4 کھلاڑیوں کو آؤٹ کیا۔ راشد خان نے دو جبکہ ڈیوڈ ویسا نے ایک وکٹ حاصل کی۔