ہر سال پانی کے استعمال کی شرح میں ایک فیصد اضافہ ہوتا ہے، رپورٹ

اقوام متحدہ نے کہا ہے کہ موسمیاتی تبدیلیوں، آبادی میں اضافے اور کاشتکاری کے طریقوں میں تبدیلی کے باعث آنے والی دہائیوں میں اربوں افراد کو پانی کی شدید ترین قلت کا سامنا رہے گا۔ ادارے کی جانب سے پانی کے عالمی دن پر جاری کی گئی رپورٹ میں کہا گیا ہے کہ ضرورت سے زیادہ استعمال اور آلودگی کے علاوہ عالمی درجہ حرارت میں اضافے کے باعث بھی پانی کی قلت بڑھ رہی ہے۔

رپورٹ کے مطابق تاریخی لحاظ سے ہر سال پانی کے استعمال کی شرح میں ایک فیصد اضافہ ہوتا ہے، جس کے تحت 2050ء تک دنیا بھر میں لوگ 25 فیصد زیادہ پانی استعمال کر رہے ہوں گے۔ رپورٹ میں بتایا گیا ہے کہ 2016ء کے دوران 93 کروڑ سے زیادہ افراد کو پانی کی قلت کا سامنا تھا، جبکہ 2050ء میں یہ تعداد 2 ارب 40 کروڑ تک پہنچ جائے گی۔

رپورٹ کے مطابق پانی کی قلت کے حوالے سے بھارت دنیا میں سب سے زیادہ متاثر ہونے والا ملک ہوگا، جبکہ دیہات کے مقابلے میں شہری آبادی کو پانی کی قلت کے باعث زیادہ مشکلات کا سامنا ہوگا۔