افغانستان کے خلاف پہلا ٹی ٹوئنٹی میچ کھیلنے والے کھلاڑی احسان اللہ انٹرنیشنل ڈیبیو میں پہلی گیند پر وکٹ لینے والے دوسرے پاکستانی بولر بن گئے۔

گزشتہ روز پاکستان اور افغانستان کے درمیان تین ٹی ٹوئنٹی میچز کی سیریز کا پہلا میچ شارجہ میں کھیلا گیا، جس میں افغانستان نے پاکستان کو 6 وکٹس سے شکست دی۔ پاکستان کی جانب سے 93 رنز کے ہدف کے تعاقب میں افغان کرکٹ ٹیم کے کھلاڑی ابراہیم زادران کو احسان اللہ نے ڈیبیو میچ میں اپنی پہلی بال پر آؤٹ کیا۔

اسی اوور کی تیسری گیند پر احسان نے گُل بدین نائب کو پویلین کی راہ دکھائی۔ احسان اللہ نے اس میچ میں 3.5 اوورز میں 17 رنز دے کر دو کھلاڑیوں کو آؤٹ کیا۔ واضح رہے کہ اس سے قبل عامر یامین  نے 30 نومبر 2015 میں شارجہ کرکٹ اسٹیڈیم میں ہی اپنے انٹرنیشنل ٹی ٹوئنٹی کیرئیر کے ڈیبیو میں انگلینڈ کے جیسن رائے کو پہلی گیند پر آؤٹ کیا تھا۔