فیفا انڈر-ٹونٹی عالمی کپ انڈونیشیا میں 20 مئی سے 11 جون تک شیڈول تھا

فٹبال کی عالمی گورننگ باڈی فیفا نے انڈونیشیا کو انڈر-ٹونٹی عالمی کپ کی میزبانی سے محروم کردیا۔ عرب ذرائع ابلاغ کے مطابق یہ فیصلہ انڈونیشیا کے صوبے بالی کے گورنر کی جانب سے ایونٹ میں صیہونی ٹیم کو خوش آمدید کہنے سے انکار کرنے کی پاداش میں کیا گیا۔

یاد رہے کہ فیفا انڈر-ٹونٹی عالمی کپ رواں سال انڈونیشیا میں 20 مئی سے 11 جون تک شیڈول تھا۔ فیفا کا کہان ہے کہ انڈر-ٹونٹی عالمی کپ کیلئے متبادل میزبان ملک اور انڈونیشیا کے خلاف مزید جرمانوں کا اعلان بھی جلد کیا جائے گا، ، تاہم ایونٹ کا شیڈول فی الحال تبدیل نہیں کیا جا رہا۔

انڈونیشیا کے دارالحکومت جکارتہ میں گزشتہ دنوں صیہونی ٹیم کی متوقع شرکت پر مظاہرہ بھی کیا گیا تھا، جس میں مظاہرین نے انڈونیشیا اور فلسطین کے پرچم اٹھائے ہوئے تھے۔ ماہرین کے مطابق اب میزبانی چھینے جانے کے بعد انڈونیشیا کا اس ایونٹ میں شرکت کا امکان بھی ختم ہوچکا ہے۔ واضح رہے کہ انڈونیشیا کی فٹبال ٹیم 1979ء کے بعد سے اب تک ٹورنامنٹ کیلئے کوالیفائی نہیں کرسکی۔