وزیرِ اعظم محمد شہباز شریف سے پاکستان میں تعینات ترکیہ کے سفیر مہمت پاچاجی نے اسلام آباد میں ملاقات کی۔

اس موقع پر وزیر اعظم نے اپنے حالیہ دورہِ ترکیہ کے موقع پر شاندار مہمان نوازی پر ترک صدر رجب طیب اردوان اور حکومتِ ترکیہ کا شکریہ ادا کیا۔ ان کا کہنا تھا کہ پاکستان اور ترکیہ کے درمیان برادرانہ تاریخی تعلقات قائم ہیں جو مشترکہ عقیدے اور باہمی احترام پر مبنی ہیں اور دونوں ممالک کے عوام ایک دوسرے کیلئے بہت عزت و احترام رکھتے ہیں۔

وزیر اعظم نے ترک صدر رجب طیب اردوان کی قیادت میں ترکیہ کی نئی بننے والی کابینہ کیلئے نیک خواہشات کا اظہار کیا۔ وزیر اعظم نے مزید کہا کہ پاکستان ترکیہ کے ساتھ تجارت، سرمایہ کاری، اعلی تعلیم، سیاحت، انفراسٹرکچر ڈویلپمنٹ و دیگر شعبوں میں تعاون کو مزید فروغ دینے کا خواہشمند ہے۔

انہوں نے اپنے دورے کے موقع پر ترک سرمایہ کاروں اور کاروباری شخصیات سے ملاقات کا ذکر کرتے ہوئے کہا کہ پاکستان میں اس وقت بیرونی سرمایہ کاری کا موزوں ترین وقت ہے جبکہ ترک کمپنیوں کی اس حوالے سے گہری دلچسپی خوش آئند ہے۔ وزیر اعظم کا کہنا تھا کہ پاکستان ہائی لیول اسٹریٹجک کواپریٹیو کونسل کے ساتویں اجلاس کیلئے ترک صدر کے دورہِ پاکستان کا منتظر ہے۔