چین میں پاکستان کے سفیر مسعود خالد نے کہا ہے کہ سی پیک دی بیلٹ اینڈ روڈ انیشیٹو کا ایک فلیگ شپ منصوبہ ہے جودونوں ممالک کی اعلی قیادت کے وژن کا عکاس ہے۔ چین اور پاکستان کے درمیان سی پیک کے حوالے سے منعقدہ عالمی سیمینار سے خطاب کرتے ہوئے انھوں نے کہا کہ دو ہزار تیرہ میں سی پیک کے آغاز کے بعد مسلسل مثبت پیش رفت ہوئی ہے ۔ چین میں پاکستانی سفیر نے کہاکہ سی پیک کی بدولت خطے میں امن، استحکام اور خوشحالی کو فروغ ملے گا۔
پاکستان کی وزارت برائے منصوبہ بندی ،ترقی و اصلاحات میں سی پیک پروجیکٹ ڈائریکٹر حسان داود بٹ نے کہا کہ پاکستان اور چین کے درمیان اتفاق رائے پایا جاتا ہے کہ تیز رفتاری سے صنعتی تعاون کو آگے بڑھایا جائے گا اور اس ضمن میں چینی ماہرین پاکستانی اداروں کے ساتھ مل کر کام کر رہے ہیں۔

پاکستان کے معروف تھنک ٹینک ایس ڈی پی آئی کے سربراہ عابد قیوم سلہری نے کہا کہ پاکستان میں خصوصی اقتصادی زونز کے قیام سے پاکستان کی معیشت بہتر ہو گی ، غربت کے خاتمے میں مدد ملے گی اور مقامی افراد کے لیے روزگار کی فراہمی کے مواقع میسر آئیں گے۔
تقریب میں شریک دیگر شرکاء نے کہا کہ سی پیک کی بدولت چین۔پاک تعلقات مضبوط ترین معاشی تعلقات میں تبدیل ہو چکے ہیں۔شرکاء نے سی پیک کے تحت جاری منصوبہ جات کی پیش رفت پر اطمینان کا اظہار کرتے ہوئے کہا کہ دی بیلٹ اینڈ روڈ انیشیٹو کے دیگر شراکت داروں کے لیے سی پیک ایک بہترین مثال ہے۔دو روز تک جاری رہنے والے عالمی سیمینار کے دوران ماہرین چین۔پاک صنعتی تعاون ،صنعتی زونز کی تعمیر ، سی پیک کی کامیاب تکمیل کی راہ میں حائل چیلنجز ، پاکستان میں شعبہ خدمات کی ترقی ، سی پیک کے تحت تعلیمی و افرادی تبادلوں کے فروغ سمیت فریقین کے درمیان توانائی ، زراعت ، میڈیا ، سیاحت اور دیگر شعبہ جات میں تعاون کے حوالے سے تبادلہ خیال کریں گے۔