پاک فوج کے شعبہ تعلقات عامہ کا کہنا ہے کہ 27 فروری کا واقعہ تاریخ کا حصہ بن چکا ہے۔

آئی ایس پی آر کا کہنا ہے کہ دو بھارتی طیاروں نے ایل او سی کی خلاف ورزی کی تو پاک فضائیہ نے انہیں نشانہ بنایا۔ آئی ایس پی آرکا اپنے بیان میں کہنا ہے کہ فضائی کارروائی کے بعد بھارت کا یہ واویلا بے معنی ہے کہ بھارتی طیاروں کو ایف 16 نے نشانہ بنایا۔ آئی ایس پی آر کا کہنا ہے کہ پاک فضائیہ نے دونوں بھارتی طیاروں کو اپنے دفاع میں مار گرایا، جب بھارتی طیارے آئے تو پاکستان کے ایف 16 سمیت تمام طیارے فضا میں تھے۔ آئی ایس پی آر کے مطابق اگر ایف 16 استعمال ہوا تب بھی دو بھارتی طیارے ہی نشانہ بنے اور پاکستان دفاع میں اپنی مرضی کے مطابق ہرصلاحیت کے استعمال کا حق رکھتا ہے-