چین نے کہا ہے کہ مسئلہ کشمیر پراس کا مؤقف بہت واضح اور پختہ ہے کہ یہ تنازعہ متعلقہ فریقوں کے درمیان مذاکرات کے ذریعے حل کیا جانا چاہیئے۔

اے پی پی سے گفتگو کرتے ہوئے چین کی وزارت خارجہ کے ترجمان کنگ شوانگ نے کہا کہ مسعود اظہرکا نام ممنوعہ فہرست میں شامل کرنے کی منظوری کا مسئلہ کشمیر سے کوئی تعلق نہیں اوراس سے کشمیر کے دیرینہ تنازعہ پرچین کے مؤقف میں کوئی تبدیلی نہیں آئے گی۔ انہو ں نے کہا کہ پاکستان نے دہشت گردی کے خلاف جنگ میں بے مثال کردار ادا کیا ہے جو عالمی برادری کی جانب سے مکمل اعتراف کا متقاضی ہے۔ ترجمان نے کہا کہ چین دہشت گرد اور انتہاپسند قوتوں کے خلاف پاکستان کی کوششوں کی بھرپورحمایت جاری رکھے گا۔