وزیرخارجہ شاہ محمود قریشی کا کہنا ہے کہ نئی بھارتی حکومت سے مذاکرات کیلئے تیار ہیں، دونوں ہمسایہ ممالک کو خطے میں امن کے قیام کیلئے مذاکرات کی میز پربیٹھنا پڑے گا۔

ان کا کہنا تھا کہ خطے میں امن کا قیام پاکستان کی خواہش بھی ہے اور ترجیح بھی، افغانستان خطے میں اہم ملک ہے، افغانستان سے ملحقہ تمام ہمسایہ ممالک کا امن افغانستان سے وابستہ ہے۔ ملتان میں ذرائع ابلاغ کے نمائندوں سے گفتگوکرتے ہوئے شاہ محمود قریشی کا کہنا تھا کہ خواہش ہے افغانستان میں امن قائم ہو تاکہ پائیدارعلاقائی استحکام کی راہ ہموار ہو۔ انہوں نے کہا کہ دہشت گردی کے حالیہ واقعات پر تشویش ہے، نیشنل ایکشن پلان پرعمل کر کے دہشت گردی پر قابو پایا جا سکتا ہے-